قصيدة لعيد الأم – ريما مراد – Annashra Magazine مجلة النشرة

يا أول كلمي ع تمّي يا إمّي
فتّحت عيوني يا إمّي وأنا عم فتّش
بهالعالم المجهول حواليّي عن رسمك
فتّش عن مين على وجّا دموعي رشرش
شفت وجك يا إمي، وعم يرجف جسمك
ودموعك سبقت دموعي عالمخدي تشكشك
الوجع المليان بالفرح والفخر والبسمي ع إسمك

وبلّشت إكبر يا إمي، وصار عمري كم شهر
وبلّشت شوف هالعالم المجهول بعيونك الكلّا فخر
وبالرغم من التعب والسهر ما شفت ع وجك القهر
وكبرت وإنتي سهراني عليّي تبلبلي وجّي بوسات
وتهمسي بدِنيّي ألحان رقيقة أحلى همسات
تحتّى إغفى بلكي بتسرقي من السّاعة شويّة دقات
بس حتّى بأحلامك يا إمي إسمي عشفافك ما مات

وضلّيت إكبر يا إمّي وصار عمري كم سني
ووجّك بجفوني ضلّ ينحفر ونورك السني
يضوّي طريق حياتي بأعذب كلمات
عن الصدق والشهامة والأخلاق ، حتى زالت العتمات

وصرت كبير يا إمي وواجهت مصاعب الحياة
بكل شجاعة وكِبَر، لأني ع إيدك تربّيت
وكل الزرع يلّي زرعتي فيّي يا إمي ما مات
وصرت بأرقى مراتب وتفوّقت بفضلك يا ست الستات

يا جبّارة يا حاملي هموم البشر
يا قوّية كلّك جبروت وكلّك كبر
وشو بدّي بعد لاقي صفات وعِبَر
توصفك وتعطيكي حقّك وتوفيكي السّهر

إنت العمر يلّي ما بيتكرّر مرتين
بحبّك أكثر ما الحب بيحبّ الحبّ بمرتين
إمّي يا هالملاك يا هالقلب الكبير
إمّي يا أروع إنساني يا أعطر من العبير
إمّي يا سندي بالهدني، بعجز عن التعبير
عن امتناني وشكري ليَلّي عطاني ياكي: للقدير

أنا بدونك يا إمّي ما عندي جناح
إنتي لزرعتي الأخلاق بإيدي سلاح
تَواجه أخطار هالدني بقوّة وكفاح
ومهمَا هبّت عليّي عواصف ورياح
كتفك يا إمّي هوّي الملجأ يلّي ع مخدّتو برتاج
إنتي لغرست بتربة بيتنا ورد المحبّة وتركتيلي المفتاح

إنتي يا إمّي الوردة منّك بتغار
ومنّك بيتسابق بألوانو الليل والنهار
الوردة يلّي يتتفاخر بعطرا وبأجمل عطر
بتغار من ريحة عطورك العمرا ميّة دهر
وبستان الورد المشلوح خلف البيوت
المليان ياسمين وفلّ وعنبر وياقوت
بضوّي هدايا على عنقك حنان وع خصرك جبروت

يا إمّي يا بلسم الجروح
قديش ع كتفك بكيت وأنا المجروح
لملمتي دموعي بشفافك وقلتي مش مسموح
كل ما أنا عايشة شوفك مقهور وتعبان ومطروح
بعذابات الدّني أنا عنّك بتحمّل العذاب وتعب الروح

صلاتك يا إمّي ليليّ بتعبّدلي الطريق
ضمّيتي بجناحك ولادك وصارو أحلى فريق
بيهزموا سوا المصاعب وبيتّحدوا بالفرح والضّيق
وبعبّوا بسلّة حياتن نصايحك تيكونوا أحلى صديقة وصديق

خلّيكي يا إمّي سهراني عليّي وما تفلّي
خلّيكي بعد شوّي مع عيلتك ضلّي
ع المخدة زرعي قصص وأساطير
وأنا إسرح بخيالي وطير
وبعالم الأحلام وع قوس قزح صير
شمشم الوانو بلكي بعبّد ألوان طريقي وسير

قولك يا إمّي الشمس رح تشرق من بعدك
والقمر رح يسرح بوجّو البسّام متل وجّك
بحس الدني يا إمّي لما تفلّي رح تخلص
والحياة متل الموت رح تغيب ورح ترخص

شو بدّي إحكي وقول يا إمي خلص الكلام
نِشفو الحروف ع تمّي وتعبو بدونك من غدر الأيّام
نهار واحد بالسّنة ما بكفّي يا إمّي عن جدّ حرام
كلّ السّنة هي عيدك ع عدد الفصول والأيام
أُمنية وحدي محفورة علسان كل إنسان وبقلّك بالختام
كلّ سني وإنت سالمة يا إمّي وبلقي عليك أحلى سلام.